Papaccur/ Pepaccur

Papaccur/ Pepaccur
Papaccur iolah salah satew kesenian lappung, terutamo seni sastra sei isseine nasihat, harapan, petunjuk dilem pengejukkan adek/gelagh. Papaccur dipakai dilem upacaro adat gegeh kawinan jamo selamatan. Biasone ditigehke diwattew agow ngamai adek jamo nginai adek. Papaccur dibacoke tokoh sei ahlei dilem ngelagewke sesuai iramane. Sei kedo cirei-cireine iolah:
 
  1. Mak makko pembukaan
  2. Isseine nasihat
  3. Ngemik pola ab ab, abcd, abc abc
  4. Dapek ditigehke dikedow jugo, terutamo di acaro adat budayo dan begawei
  5. Terdirei anjak sejumlah bait dan tiap bait terdirei atas pak atau enem baris. Jumlah bait tergattung cutik nyow nayahne sei ago ditigehke atau di juk nasihat.
Cuttew papaccur sei wat:
 
Sesikun ulun ghebei
Lagei lak ketinggalan
Tigeh di jaman tano
Akuklah ilmeu paghei
Semungguk wat isian
Cemungak tando hapo
 
Dang mak nemen bekerjo
Dang besai inei iteu
Disiplin utamoko
Dang lalai jamo wattew
 
Syukur alhamdulilah
Tigeh judeumeu tano
Dendeng segalo badan
Kekalau metei wo tuah
Ino sai upo du’o
Kiluyan adek Tuhan
 
Tano tigeh judeumeu
Memugo mettei wo rawan
Tigeh alam salah nei
Tuah nyepik di kukeu
Ules ninding dibadan
Rezekei tawit milei
 
Basing upo masalah
Perlew becawo
Jamo kaban wewaghian
Najin sepuluh mudah
Sebalas gham bertanyo
Mangi mak salah jaluran
 
Jamo Lah- Uyang dang makko lalat
Pilih pikiran kidapek ngesai
Bebasing rasan jejamo ngakkat
Walau yo biyak mak ghaso palai
 
Agamo dang sapppai lalai
Lakunei perittah Tuhan
Jawehei sai mak beguno
Adat munih tepakai
Mufakat, sakai sambayan
Nemui nyimah dang lupo
 
Cukup pai bales ijo
Panggeh sikam di nikeu
Mahhappun ngalimpuro
Katteu wat cawo teliyeu
 
Inolah salah satu seni tradisi gham lappung. Sei ikam kutip anjak berbagai sumber, terutamo issei papaccur sino sikam kutip anjak Jurnal FKIP unila sei ditulis Sukmawati, Muhammad Fuad dan Munaris. Mungkin gaweh nayah gham tano sei mak pandai, mak pahhem ulah gham mak makko sarana sei memadai pakai mempelajari adat budayo gham sayan. Ditengah-tengah himpitan kebudayaan sei baghih gham ngemik tantangan sei luas. Nyow kah gham agow mempertahankan adat istiadat sei kak diwariske appew tuyuk gham anjak ghebei, nyow kah gham nagenke segalo sei wat tano nakhat tegerus arus budayo global? unyenne di pungew ghamlah segalo tantangan sino, sebagai generasi penerus adat budayo lappung. Salam Kemuakhian..

Sumber: guntursubing.blogspot.com

Recommended For You

About the Author: Guntur Subing

Memiliki hobi tulis menulis dan mengelola blog. Moto; "Bersemangat dalam Pengembangan Diri dan Terus Belajar Sampai Akhir Hayat"

Tinggalkan Balasan

Alamat email Anda tidak akan dipublikasikan.